Kva gjer at menneske køyrer bilar inn i menneskemengder, skyt ungdom på ei øy eller sprenger seg sjølv og andre i lufta? Kvifor vil unge menneske reise til krig og terror i Syria? Er det idealisme, hat eller spenning som er drivkrafta? Reiser dei til noko, eller frå noko?

Forestillinga Nadia undersøker kva som ligg bak Nadias avgjerd om å reise til Syria. Framsyninga tematiserer radikalisering, spørsmål om identitet, kva det vil seie å høyre til og kva slags livsval unge menneske kan stå overfor.

Nadia er ein del av samarbeidet i nettverket European Theatre Convention. Teater i Parma, Liege, Braunschweig, Amsterdam og Det Norske Teatret i Oslo har framsyninga på repertoaret i løpet av 2017.